4 nga 5 influencues që thyejnë rregullat mbi përmbajtjen komerciale

Mbikqyrja mbuloi 576 influencues nga 22 vende anëtare të BE, duke përfshirë Luksemburgun, Norvegjinë dhe Islandën. Ajo tregoi se deri në 97% e tyre postuan përmbajtje komerciale, por vetëm 20% thanë se ishte reklamë. Raporti i Komisionit Evropian gjeti gjithashtu se deri në 62% e influencuesve nuk ndiqnin rregullat.

Influencuesit përdorën fjalë të tjera si “bashkëpunim” (16%), “partneritet” (15%) ose një falënderim të përgjithshëm për markën partnere (11%) në vend të etiketës së duhur “bashkëpunim me pagesë”.

Postimet ishin kryesisht të lidhura me modën, stilin e jetesës, bukurinë, ushqimin, udhëtimin dhe formën fizike. Studimi zbuloi se 119 influencues madje nxitën aktivitete jo të shëndetshme ose të rrezikshme si ushqimi pa vlerë, pijet alkoolike, procedurat mjekësore ose kozmetike, lojërat e fatit apo shërbimet financiare të tilla si tregtia e kriptovalutave.

Më 17 shkurt 2024 do të hyjë në fuqi Ligji për Shërbimet Digjitale, që kërkon besueshmëri dhe siguri më të madhe të internetit. Sipas DSA, influencuesve do t’u kërkohet të deklarojnë nëse përmbajtja e tyre përmban mesazhe komerciale dhe të japin informacion gjurmueshmërie.

Qëllimi i mbikqyrjes ishte të kontrollonte në se influencuesit përputhen me ligjin e konsumit të BE. Ajo shikoi postimet në Instagram, TikTok, YouTube, Facebook, X, Snapchat dhe Twitch. 82 influencues kishin më shumë se 1 milion ndjekës, 301 kishin më shumë se 100.000 dhe 73 kishin nga 5.000 deri në 100.000 ndjekës.

Nga 576 profilet, 358 u zgjodhën për hetime të mëtejshme. Ata do të kontaktohen nga autoritetet kombëtare për t’u kërkuar atyre të respektojnë rregullat. Madje mund të ndërmarrin veprime të mëtejshme për zbatimin e ligjit.